LOAF TIDINGS

ലാളിത്യത്തിന്റെ മാർഗദർശി

  ജീസസ് യൂത്തിൽ ഫുൾടൈമർ ആയി പ്രവർത്തിക്കുന്ന കാലഘട്ടം..,.... മണിപ്പൂരിലേക്കുള്ള യാത്രയ്ക്കിടയിലാണ് ഞങ്ങൾ കുറച്ചു ദിവസം കൽക്കട്ടയിൽ ചെലവഴിച്ചത്. വിശുദ്ധയായ മദർ തെരേസയെ കാണുവാനും അവരോട് സംസാരിക്കുവാനും അവരിൽ നിന്ന് അനുഗ്രഹം സ്വീകരിക്കുവാനുമായി ഞങ്ങൾക്ക് ആ ദിവസങ്ങളിൽ അവസരം ലഭിച്ചു. കൂടെയുണ്ടായിരുന്ന വൈദികന്റെ ഒരു ബന്ധു മദർ തെരേസയുടെ സിസ്റ്റേഴ്സ് ഓഫ് ചാരിറ്റി കോൺഗ്രിഗേഷനിൽ കന്യാസ്ത്രീ ആയതിനാൽ ഞങ്ങൾക്ക് മദർ തെരേസയുടെ മറ്റൊരു കോൺവെന്റിൽ താമസിക്കാനുള്ള അവസരവും ലഭിച്ചു. അതനുസരിച്ച് പിറ്റേന്ന് രാവിലെ മദർ തെരേസയെ കാണുവാനുള്ള അപ്പോയിൻമെന്റ് ഞങ്ങൾക്ക് കിട്ടി. മദർ തെരേസയുടെ ആശ്രമത്തിലേക്ക് ഞങ്ങളെ സ്വീകരിച്ചത് ഒരു വിദേശ കന്യാസ്ത്രീ ആയിരുന്നു. ഞങ്ങൾ ചെല്ലുമ്പോൾ ഞങ്ങൾക്ക് നല്ല രീതിയിലുള്ള സ്വീകരണം നൽകിയതിനു ശേഷം ആ സിസ്റ്റർ പോയി സിസ്സ്റ്ററിന്റെ നീല കരയുള്ള വെളുത്ത സാരി കഴുകുന്നത് ഞങ്ങൾ കണ്ടു. അതിനുശേഷം തിരിച്ചുവന്ന് ഞങ്ങളോട് മദർ തെരേസയുടെ വിശേഷങ്ങൾ പങ്കുവയ്ക്കുകയും അവിടെ ചെയ്യുന്ന കാരുണ്യപ്രവർത്തികളെക്കുറിച്ച് ഞങ്ങളോട് പറയുകയും ചെയ്തു.ഇതിനിടയിലാണ് താൻ വസ്ത്രം കഴുകാൻ പോയതിന്റെ പ്രാധാന്യം സിസ്റ്റർ ഞങ്ങളോട് പറഞ്ഞത്. വിദേശത്തുനിന്ന് ഇന്ത്യയിലേക്ക് എത്തി മദർ തെരേസയുടെ കോൺവെന്റിൽ പ്രവർത്തിക്കുന്ന ഈ സിസ്റ്റർ, *ദാരിദ്ര്യ വ്രതം* സ്വീകരിച്ചതിന്റെ ഭാഗമായി രണ്ട് വെളുത്ത സാരികളാണ് മദർ തെരേസ ഈ സിസ്റ്റേഴ്സിന് നൽകുന്നത്. മദർ നൽകിയ ഈ രണ്ടു സാരികളിൽ ഒരു സാരി ഉപയോഗിക്കുകയും മറ്റൊരു സാരി കഴുകിയെടുക്കാനും വേണ്ടിയാണ് സിസ്റ്റർ ആ സമയം ഞങ്ങളുടെ അടുത്ത് നിന്ന് പുറത്തേക്ക് പോയത്.

കൽക്കട്ടയിലെ അഴുക്കുപുരണ്ട തെരുവോരങ്ങളിൽ ദാരിദ്ര്യത്തിന്റെ വഴിയിലൂടെ കാരുണ്യപ്രവർത്തകളുമായി നീങ്ങുന്ന മദർ തെരേസ സിസ്റ്റേഴ്സിന് രണ്ടു വസ്ത്രങ്ങളെ ഉള്ളൂ.... എന്നുള്ളത് എന്നെ ഏറെ ചിന്തിപ്പിച്ചു. ഫാഷൻ അനുസരിച്ച് വസ്ത്രങ്ങൾ മാറുകയും വസ്ത്രങ്ങളുടെ ഉപയോഗത്തിലും മറ്റുള്ള വസ്തുക്കളുടെ ഉപയോഗത്തിലും ലാളിത്യവും ദാരിദ്ര്യ ചിന്തയും കൊണ്ടുവരണമെന്നും ക്രിസ്തീയ ജീവിതത്തിന്റെ അടിസ്ഥാനം ലളിതജീവിതം ആണെന്നും ഡിഗ്രി കാലഘട്ടത്തിൽ എന്നെ പഠിപ്പിച്ച ഒരു അനുഭവമായിരുന്നു ഇത്. ദാരിദ്ര്യവൃതത്തിൽ ഊന്നിയ ക്രിസ്തീയ ജീവിതശൈലി കെട്ടിപ്പടുക്കണമെന്ന് ആ സിസ്റ്ററുടെ ചെറിയ ഒരു മാതൃക എന്നെ ഏറെ പ്രചോദിപ്പിച്ചു

*ലോഫിൽ* വന്ന കാലം മുതൽ കേൾക്കുന്ന ലളിത ജീവിതത്തിന്റെ പ്രാധാന്യം കുറെ കൂടി ആഴങ്ങളിൽ മനസ്സിലാക്കാൻ കർത്താവ് എന്നെ കഴിഞ്ഞ വർഷങ്ങളിലൂടെ പരിശീലിപ്പിച്ചു. കുടുംബ ജീവിതത്തിന്റെ എല്ലാ തീരുമാനങ്ങളിലും മേഖലകളിലും മക്കളെ പരിശീലിപ്പിക്കുന്നതിലും ദാരിദ്ര്യവ്രതം അനുസരിച്ച് ജീവിതശൈലി ക്രമീകരിക്കുന്നതിലും കർത്താവ് ഞങ്ങളെ അനുദിനം വളർത്തിക്കൊണ്ടിരിക്കുന്നു. ആഡംബരങ്ങളിലും ആഘോഷങ്ങളിലും പാലിക്കേണ്ട ലാളിത്യവും വ്യക്തിപരമായി ദൈവത്തിൽ ആശ്രയിക്കേണ്ടതിന്റെ പ്രാധാന്യവും ഈ വ്രതം ഞങ്ങളെ ഏറെ പരിശീലിപ്പിച്ചു മുന്നോട്ട് കൊണ്ടുപോകുന്നു. ആകാശത്തിലെ പറവകളെ പരിപാലിക്കുന്ന ദൈവം നമ്മളെയും പരിപാലിക്കുമെന്നും തനിക്കുള്ള രണ്ടുടുപ്പിൽ നിന്ന് ഒരെണ്ണം ഇല്ലാത്തവനുമായി പങ്കുവെക്കേണ്ടതിന്റെ പ്രാധാന്യവും ദാരിദ്രവ്രതം നമ്മെ എപ്പോഴും ഓർമിപ്പിച്ചു കൊണ്ടിരിക്കുന്നു.

മണ്ണിനെയും വിണ്ണിനേയും കൂട്ടിയിണക്കാൻ ഭൂമിയിൽ അവതീർണനായ ക്രിസ്തുനാഥൻ എളിമയുടെ മാർഗത്തിലൂടെ ബത്ലഹേമിലെ കുഞ്ഞു കാലിത്തൊഴുത്തിലേക്ക് ഒരു ശിശുവായി എളിമപ്പെട്ട് ലളിത ജീവിതത്തിലേക്ക് കടന്നുവന്നതുപോലെ കർത്താവേ ഞങ്ങളുടെ ജീവിതങ്ങളിലും അഹങ്കാരവും ആഡംബരങ്ങളോടുള്ള ഭ്രമവും ഉപേക്ഷിച്ച് ലളിത ജീവിതം നയിക്കുവാനും എളിമപ്പെടുവാനും ഞങ്ങളെ ശക്തിപ്പെടുത്തണമേ..... 🙏ആമേൻ