LOAF TIDINGS

ഫ്രാന്‍സിസ് മാര്‍പാപ്പ തന്റെ അജപാലന ശുശ്രൂഷകളില്‍ അപ്പനടുത്ത സ്വാതന്ത്ര്യത്തോടെ ദമ്പതിമാരെ ഉപദേശിക്കുന്നത് പലപ്പോഴും നാം ശ്രദ്ധിച്ചിട്ടുള്ളതാണ്. സ്‌നേഹത്തിന്റെ ആനന്ദം എന്ന തന്റെ അപ്പസ്‌തോലിക പ്രബോധനം മുഴുവന്‍ ഈ കാലഘട്ടത്തില്‍ ദമ്പതികളുടെ ജീവിതം ആനന്ദപൂര്‍ണമാക്കാനുള്ള നിര്‍ദ്ദേശങ്ങളാണ്. അദ്ദേഹത്തിന്റെ അഭിപ്രായത്തില്‍ വിവാഹജീവിതത്തിലെ സന്തോഷം എപ്പോഴും ചെറിയ കാര്യങ്ങളില്‍ (little things) ആയിരിക്കണം. ഉപഭോഗസംസ്‌ക്കാരത്തില്‍ ജീവിക്കുന്ന നമ്മെ സംബന്ധിച്ചിടത്തോളം ഇന്ന് സ്‌നേഹം അളക്കപ്പെടുന്നത് സമ്പത്തിന്റെ അടിസ്ഥാനത്തിലാണ്. വിലകൂടിയ മൊമ്പൈല്‍ ഫോണ്‍, ആഡംബര വീടുകള്‍, വിലകൂടിയ വസ്ത്രങ്ങള്‍ തുടങ്ങിയവ പൊങ്ങച്ചത്തിന്റെ പ്രതീകമായിരിക്കുന്നു. ഒരുമിച്ച് ഭക്ഷണം പാകം ചെയ്യുക, ഭക്ഷണം ഉള്‍പ്പെടെ ഒന്നും പാഴാക്കാതിരിക്കുക, കുടുംബാംഗങ്ങള്‍ക്ക് ചെയ്യാന്‍ സാധിക്കുന്ന വീട്ടിലെ ജോലികള്‍ കുടുംബാംഗങ്ങള്‍ തന്നെ ചെയ്യുക തുടങ്ങിയ കാര്യങ്ങള്‍ ലളിത ജീവിതത്തിന്റെ ഭാഗമാണ്.

വിശുദ്ധ ജോണ്‍പോള്‍ രണ്ടാമന്‍ മാര്‍പാപ്പയുടെ അഭിപ്രായത്തില്‍ കുടുംബജീവിത്തതിലെ ലാളിത്യം ദമ്പതികളുടെ വ്യക്തിജീവിതവുമായി ബന്ധപ്പെടുത്തിയാണ്. ദമ്പതികള്‍ പരസ്പരമുള്ള വിശ്വസ്തത, ജീവിതത്തിലെ ആത്മനിയന്ത്രണം തുടങ്ങിയവ ലളിതജീവിതത്തിന്റെ ഭാഗമാണ്. പോള്‍ ആറാമന്‍ മാര്‍പാപ്പ മനുഷ്യജീവനുമായി ബന്ധപ്പെടുത്തിയാണ് ദമ്പതികളുടെ ലളിതജീവിതത്തെ വിവരിക്കുന്നത്. ഭൗതികമായ കണക്കുകൂട്ടലുകള്‍ക്ക് അപ്പുറം ദാമ്പത്യത്തില്‍ ദൈവം നല്‍കുന്ന ജീവനെ ഔദാര്യപൂര്‍വ്വം സ്വീകരിക്കുന്നതാണ് ലളിതജീവിതം. ആഡംബരത്തോടുള്ള അകലം ദമ്പതികളുടെ ജീവിതത്തെ തങ്ങളുടെ മക്കളോടും പാവപ്പെട്ടവരോടും സമൂഹത്തോടുമുള്ള ഉത്തരവാദിത്വത്തിലേക്ക് വളര്‍ത്തുമെന്ന് ബനഡിക്ട് പതിനാറാമന്‍ മാര്‍പാപ്പ നമ്മെ പഠിപ്പിക്കുന്നു.

എല്ലാ ദിവസവും ദമ്പതികള്‍ ഒരുമിച്ച് പ്രാര്‍ത്ഥിക്കുന്നതും, ദമ്പതികള്‍ ഒരുമിച്ച് സാമ്പത്തിക ബാദ്ധ്യത വരാതെ കുടുംബ ബഡ്ജറ്റ് തയ്യാറാക്കുന്നതും, പരസ്പരം ക്ഷമിക്കുന്നതും, ജോലികളില്‍ പരസ്പരം സഹായിക്കുന്നതും, മറ്റുളളവരോട് ആതിഥ്യ മര്യാദ പാലിക്കുന്നതും പാവപ്പെട്ടവരെ സഹായിക്കുന്നതും ലളിത ജീവിതത്തിന്റെ ഭാഗമാണ്. ചുരുക്കത്തില്‍ ദാമ്പത്യത്തിലെ ലളിതജീവിതമെന്നാല്‍ എളിമയുള്ള, സഹാനുഭൂതിയുള്ള, ദൈവത്തില്‍ ആശ്രയിച്ചുള്ള ആര്‍ഭാടമില്ലാത്ത കുടുംബജീവിതമാണ്.

ഫാ. ഫ്രാൻസിസ് ട്വിങ്കിൾ വാഴപ്പിള്ളി,

ഡയറക്ടർ, ലോഫ്.