LOAF Thrissur Newsletter

ദൈവം അബ്രാഹത്തിന് കൊടുത്ത വാഗ്ദാനമാണ് മേൽപ്പറഞ്ഞ വചനം ഇതിൽ സന്തതി എന്ന് പരാമർശിക്കുന്നത് യേശുക്രിസ്തുവിനെ കുറിച്ചാണ് എന്ന് സ്പഷ്ടമാണ് . എല്ലാ ക്രിസ്തീയ കുടുംബങ്ങളും യേശുക്രിസ്തുവിനാൽ സ്ഥാപിതമാണ്. വിവാഹജീവിതം യേശുവിനെ കൂടാതെ മുന്നോട്ട് കൊണ്ടുപോകാൻ സാധ്യമല്ല.

ഞങ്ങളുടെ വിവാഹം കഴിഞ്ഞ് അധികം വൈകാതെ ഞങ്ങൾ തിരിച്ചറിഞ്ഞ ഒരു കാര്യമുണ്ട്. ഞാനും എൻറെ പങ്കാളിയും വളരെയധികം കുറവുകളുള്ള വ്യക്തികളാണ്. ഞങ്ങൾക്ക് പരസ്പരം സ്നേഹിക്കാൻ മാനുഷികമായ പരിമിതികൾ ഉണ്ട് . കാനായിലെ കല്യാണത്തിന് വീഞ്ഞ് തീർന്നു പോയ അവസ്ഥ.

അത്തരം സന്ദർഭങ്ങളിൽ അതിസ്വാഭാവികമായ ദൈവകൃപ കൂടാതെ പങ്കാളിയെ സ്നേഹിക്കാൻ സാധിക്കുകയില്ലെന്ന് എനിക്ക് തോന്നിയിട്ടുണ്ട്. ദിവ്യകാരുണ്യത്തിൽ സന്നിഹിതനായിരിക്കുന്ന ഈശോയെ ആരാധിക്കുമ്പോൾ വീണ്ടും സ്നേഹിക്കാൻ ഈശോ തന്റെ ആത്മാവിനാൽ ശക്തിപ്പെടുത്തുന്ന അനുഭവം ഒരുപാട് തവണ ഞാൻ അനുഭവിച്ചിട്ടുണ്ട് . ഈശോയുടെ വീഞ്ഞിന്ന് ആദ്യത്തെ വീഞ്ഞിനേക്കാൾ വീര്യം ഉണ്ടായിരുന്നതുപോലെ ഈശോയിലൂടെ സ്നേഹിക്കുമ്പോൾ പങ്കാളിയോടുള്ള സ്നേഹം മറ്റൊരു തലത്തിലേക്ക് ഉയരുന്നതായി എനിക്ക് തോന്നിയിട്ടുണ്ട്.

വിവാഹ ജീവിതത്തിൽ പലപ്പോഴും പങ്കാളിയുടെ പെരുമാറ്റം ഉൾക്കൊള്ളുവാൻ കഴിയാത്ത അവസ്ഥ ഉണ്ടാവുക സാധാരണമാണ്. ആ സമയത്ത് ഞാൻ ചെയ്തിരുന്ന ഒരു കാര്യം പങ്കാളിയെ ആരിൽ നിന്നാണോ സ്വീകരിച്ചത് ആ വ്യക്തിയുടെ അടുത്തേക്ക് തന്നെ ഞാൻ പോകും. അൾത്താരയ്ക്ക് മുന്നിൽ ഈശോയിൽ നിന്നാണല്ലോ എൻറെ പങ്കാളിയെ ഞാൻ സ്വീകരിച്ചത്. അൾത്താരയ്ക്ക് മുന്നിൽ ദിവ്യകാരുണ്യത്തിൽ സന്നിഹിതനായ ഈശോയുടെ മുമ്പിൽ ചെന്ന് ഈശോയെ ആരാധിക്കുമ്പോൾഈശോ പറഞ്ഞുതരും എൻറെ പങ്കാളിയുടെ പ്രശ്നം എന്താണെന്നും പങ്കാളി എന്തുകൊണ്ടാണ് ഇങ്ങനെ പെരുമാറുന്നതിന്നും. എൻറെ പങ്കാളിയെ പൂർണമായി മനസ്സിലാക്കാൻ കഴിവുള്ള ഈശോ കൂടെയുള്ളതിനാൽ എനിക്ക് പങ്കാളിയെ മനസ്സിലാക്കാൻ സാധിക്കും.

കുടുംബത്തിൽ പ്രശ്നങ്ങൾ ഉണ്ടാകുമ്പോൾ നാം എല്ലാവരും പതറിപ്പോവുക സ്വാഭാവികമാണ്. എന്നാൽ അത്തരം സന്ദർഭത്തിൽ എന്നെ ശക്തിപ്പെടുത്തിയ ചിന്ത ഇതാണ്. എൻറെ കുടുംബം ഈശോയാൽ സ്ഥാപിതമാണ്. അതിനെ മുന്നോട്ടുകൊണ്ടുപോകേണ്ട ആളും ഈശോ തന്നെ. ഈശോയിൽ ശരണം വെച്ചാൽ മാത്രം മതി അവിടുന്ന് എല്ലാ കാര്യങ്ങളും നോക്കിക്കൊള്ളും.

വിവാഹം കഴിഞ്ഞ് ആദ്യ മാസങ്ങളിലെ മധുവിധു കഴിഞ്ഞ് പച്ചയായ ജീവിതത്തിലേക്ക് പ്രവേശിച്ചപ്പോൾ ഞങ്ങൾ തമ്മിൽ പല കാര്യങ്ങളിലും അഭിപ്രായ വ്യത്യാസങ്ങളും നിസ്സാര കാര്യങ്ങളിൽ തർക്കങ്ങളും ഉണ്ടാവുക സാധാരണമായി. ആ സമയങ്ങളിൽ എന്നെ സ്വാധീനിച്ച ഒരു ചിന്ത ഇതായിരുന്നു. വിവാഹം നടക്കുന്നത് മൂന്നുപേർ തമ്മിലാണ് വധുവും വരനും അവരെ കൂട്ടിച്ചേർക്കുന്ന ഈശോയും. തർക്കങ്ങളും വാഗ്വാദങ്ങളും നടക്കുമ്പോൾ മാത്രം ഈശോയെ ഈ കൂട്ടായ്മയിൽ നിന്ന് എന്തിനാണ് മാറ്റിനിർത്തുന്നത്. അതുകൊണ്ട് അത്തരം സന്ദർഭങ്ങളിൽ ഞാൻ ഈശോയോട് പറയും ഈശോയും ഈ വാഗ്വാദത്തിൽ പങ്കു ചേരണം മാത്രമല്ല അടുത്ത മറുപടി ഞാൻ പറയുന്നത് ഈശോ പറഞ്ഞു തരുന്ന കാര്യമായിരിക്കും. ഇങ്ങനെ ഈശോയോട് ചോദിക്കുമ്പോൾ ഈശോ ഒരു കാര്യം പറഞ്ഞു തരും അത് പറയുന്നതോട് കൂടി പ്രശ്നങ്ങൾ അവസാനിക്കും.

18 വർഷത്തെ ദാമ്പത്യം പിന്നിടുന്ന ഞങ്ങളുടെ കുടുംബ ജീവിതം ഇപ്പോൾ സ്നേഹത്തിന്റെയും സമാധാനത്തിന്റെയും സ്വർഗ്ഗീയ അനുഭവങ്ങളുടെയും വിളനിലം ആകുന്നതിന്റെ പിന്നിൽ മൂന്നാമത്തെ വ്യക്തിയുടെ നിറഞ്ഞ സാന്നിധ്യമാണെന്ന് ഞങ്ങൾക്ക് ഉറപ്പിച്ചു പറയാൻ സാധിക്കും. വിവാഹ ജീവിതത്തിൽ പ്രശ്നങ്ങൾ ഉണ്ടാകുന്നത് പലപ്പോഴും വിവാഹം എന്ന കൂദാശയുടെ പ്രധാന കാർമി കനും മൂന്നാമത്തെ വ്യക്തിയുമായ ഈശോയെ നാം മറന്നു പോകുമ്പോഴാണ്. ഈശോയെ നാം എപ്പോഴും കൂട്ടുപിടിച്ചാൽ വിവാഹജീവിതം തീർച്ചയായും സ്വർഗ്ഗത്തിന്റെ മുന്നാസ്വാദനം തന്നെയാണ്.