LOAF TIDINGS

ദൈവം ഭൂമിയിൽ സൃഷ്ടിച്ച ഏറ്റവും ഗാഢവും നിഗൂഢവും വിശുദ്ധവുമായ ബന്ധമാണ് ദമ്പതികൾ തമ്മിലുള്ളത്. വിവാഹം എന്ന കൂദാശയിലൂടെ ഒഴുകുന്ന കൃപാവരവും ചേർക്കപ്പെടുമ്പോൾ അത് അതിവിശിഷ്ടമാകുന്നു. വിശുദ്ധരായ മാതാപിതാക്കൾക്ക് ജനിക്കുന്ന മക്കൾ വിശുദ്ധരായി തീരുമെന്നത് വാസ്തവം തന്നെ.

ഈയിടെ എന്റെ ഓഫീസിൽ നടന്ന ഒരു സംഭവം ഓർക്കുന്നു. ഞങ്ങളുടെ മെഡിക്കൽ കോളേജിൽ പഠിക്കുന്ന ഒരു വിദ്യാർത്ഥിനിയുടെ പിതാവ് വളരെ ദേഷ്യത്തോടെ ഫോൺ ചെയ്തു. തന്റെ മകളുടെ പഠന കാര്യങ്ങൾ ഒന്നും എനിക്ക് അറിയാൻ സാധിക്കുന്നില്ല, ഞങ്ങൾ കുറച്ചു മാതാപിതാക്കൾക്ക് ഈ പരാതിയുണ്ട് എന്ന് അറിയിച്ചു. ഇങ്ങനെ ഒരു പരാതി ആദ്യമായിട്ട് ആയതുകൊണ്ടും കാര്യങ്ങൾ വ്യക്തമായി മാതാപിതാക്കളെ അറിയിക്കുന്ന ഒരു സിസ്റ്റം കോളേജിൽ നിലനിൽക്കുന്നത് കൊണ്ടും ഇടയ്ക്കിടെ വിളിച്ച് കോളേജിലെ സ്റ്റാഫിനെ മുഴുവൻ വഴക്ക് പറയുന്നതു കൊണ്ടും ആ പിതാവിനെ കേൾക്കാൻ തീരുമാനിച്ചു.

വളരെ വേദനാജനകമായ കാര്യങ്ങളാണ് അദ്ദേഹം എന്നോട് പങ്കുവെച്ചത്. മകൾ അപ്പനോട് സംസാരിച്ചിട്ട് ഏഴെട്ട് മാസങ്ങളായി, അവളുടെ യൂണിവേഴ്സിറ്റി പരീക്ഷ കഴിഞ്ഞെന്ന് പോലും അപ്പൻ അറിയുന്നത് അയൽക്കാർ പറയുമ്പോഴാണ്. വർഷങ്ങളോളം ഗൾഫിൽ ജോലി ചെയ്തു ധാരാളം പണം സമ്പാദിച്ചിട്ടുള്ളയാൾ, അനുദിന വിശുദ്ധബലി മുടക്കാത്തയാൾ,... എന്നാൽ മകളെ വിളിച്ച് സംസാരിച്ചപ്പോഴാണ് അപ്പന്റെ വീട്ടിലെ പെർഫോ൪മൻസിനെ കുറിച്ച് മനസ്സിലാക്കുന്നത്. എപ്പോഴും ആക്രോശവും വഴക്കും ബഹളവും.... ബന്ധുക്കളും അയൽക്കാരുമായും യാതൊരു സമ്പർക്കവുമില്ല. പപ്പയുടെ ആക്രോശം മകൾ ഫോണിലൂടെ കേൾപ്പിച്ചു തന്നപ്പോൾ മകളെ ഉപദേശിക്കാൻ വിളിച്ച എന്റെ കണ്ണ് നിറഞ്ഞു പോയി.

കുറച്ചു മാസങ്ങൾക്ക് ശേഷം നമ്മുടെ സുഹൃത്ത് വീണ്ടും ഓഫീസ് സ്റ്റാഫിനെ വിളിച്ച് ശല്യപ്പെടുത്താൻ തുടങ്ങി. തന്റെ ഭാര്യയെ ഞാൻ ഉപദേശിക്കണം എന്നതാണ് ആവശ്യം, ഭാര്യ ടീച്ചർ ആണ്, ഒരു പാവം സ്ത്രീ .

താൻ കടന്നുപോകുന്ന വേദനകളും സഹനങ്ങളും സ്വാതന്ത്ര്യമില്ലായ്മയും, അധിക്ഷേപിക്കലുകളും ഒരു നിറഞ്ഞ പുഞ്ചിരിയുമായി മുന്നിലിരുന്ന് സംസാരിച്ച ഒരു പാവം ഭാര്യ ....നിസ്സഹായയായ അമ്മ. വളരെ നാളുകളായി ഹൃദയത്തിൽ കെട്ടിക്കിടന്ന ദുഃഖങ്ങൾ ഇറക്കിവെച്ച് യാത്ര പറയുമ്പോൾ അവർ എന്റെ മുഖത്ത് നോക്കി ഒന്ന് മാത്രം പറഞ്ഞു എല്ലാം അവസാനിപ്പിക്കാം എന്ന് വച്ചാണ് ഞാൻ ദിവസങ്ങൾ തള്ളി നീക്കുന്നത്. ഇവിടെ വന്നപ്പോൾ എനിക്ക് മുൻപോട്ടു പോകാൻ ഒരു ശക്തി കിട്ടിയതുപോലെ.

ഇനി ഇത് വായിക്കുന്ന നിങ്ങൾ ഓരോരുത്തരോടും; നമുക്ക് കുടുംബങ്ങളിൽ ഒത്തിരി നന്മ വിതയ്ക്കാൻ സാധിക്കും. അത് നമ്മുടെ കുടുംബങ്ങളിലാവാം, മറ്റ് കുടുംബങ്ങളിലാവാം, ഒന്നുറപ്പ് നാളെയുടെ മക്കൾ ഇന്നത്തെ ഭാര്യ ഭർത്താവ് ബന്ധങ്ങളുടെ പ്രതിഫലനമാണ്. ഓരോ ദമ്പതികൾക്കും ഒരു വിശുദ്ധനെയോ ഒരു ഗുണ്ടയേയോ രൂപപ്പെടുത്താൻ സാധിക്കും. നമുക്ക് കുടുംബങ്ങളിൽ പോയി രാപ്പാർക്കാം ......

 ഡോ. ബെറ്റ്‌സി തോമസ്

പ്രിൻസിപ്പാൾ & പ്രൊഫസർ ഗൈനെക്കോളജി,

അമല മെഡിക്കൽ കോളേജ്, തൃശൂർ.