LOAF TIDINGS

" കർത്താവിന്റെ ദാനമാണ് മക്കൾ, ഉദരഫലം ഒരു സമ്മാനവും. "( സങ്കീ 127:3)

നിങ്ങൾ ഇപ്പോൾ വായിച്ച ഈ തിരുവചനമാണ് ഞങ്ങൾ വിവാഹദിനത്തിന്റെ വചനമായി തിരഞ്ഞെടുത്തത്. 2011ൽ നവംബർ മാസത്തിലായിരുന്നു ഞങ്ങളുടെ വിവാഹം. വിവാഹം ആശീർവദിച്ച ബഹുമാനപ്പെട്ട ഫ്രാൻസിസ് ആളൂരച്ചൻ ഞങ്ങളെ LOAF എന്ന സംഘടനയിലേക്ക് ക്ഷണിച്ചു. ഷൈജൻ & ജെൻസി ദമ്പതികൾ തുടർന്നുള്ള മാസങ്ങളിൽ ഞങ്ങളെ ലോഫിലേക്ക് വരാൻ ഓർമ്മപ്പെടുത്തിക്കൊണ്ടിരുന്നു. ആ നാളുകളിൽ ജീസസ് യൂത്തിൽ തീക്ഷ്ണതയോടെ പ്രവർത്തിച്ചു കൊണ്ടിരിക്കുകയായിരുന്നു. 2012 ഡിസംബർ മാസത്തിൽ ഫാമിലി അപ്പോസ്തോലറ്റിൽ വച്ച് നടന്ന ലോഫ് വാർഷിക ധ്യാനത്തിൽ സംബന്ധിക്കാൻ ഞങ്ങൾക്ക് അവസരം ലഭിച്ചു. തുടർന്ന് എല്ലാ മാസത്തിലെയും രണ്ടാം ശനിയാഴ്ച നടക്കുന്ന ലോഫ് മാസധ്യാനത്തിൽ പങ്കെടുക്കുവാൻ തുടങ്ങി. 2013ൽ ആദ്യ കുഞ്ഞിനെയും 2016ൽ രണ്ടാമത്തെ കുഞ്ഞിനെയും ദൈവം ഞങ്ങൾക്ക് നൽകി. പക്ഷേ ജീവിതം മുന്നോട്ടുപോകും തോറും ജീവിത ചെലവുകളും കൂടിക്കൂടി വന്നു. ഇങ്ങനെയാണെങ്കിൽ അടുത്ത കുഞ്ഞു വന്നാൽ എങ്ങനെ മുന്നോട്ടു പോകുമെന്ന് തുടങ്ങിയ ചിന്തകൾ മനസ്സിനെ അലട്ടാൻ തുടങ്ങി. ആ സമയത്താണ് കൂടുതൽ കുഞ്ഞുങ്ങൾ ഉള്ള ലോഫിലെ കുടുംബങ്ങളെ പറ്റി ആഴത്തിൽ മനസ്സിലാക്കാൻ ശ്രമിച്ചത്. കുടുംബങ്ങളുടെ സന്തോഷവും ആനന്ദവും നേരിട്ട് അറിയാൻ ശ്രമിച്ചു. ആ കുടുംബങ്ങളിലുള്ള കുഞ്ഞുങ്ങളുടെ സ്നേഹവും പരിഗണനയും ഉത്തരവാദിത്വ ബോധവും കരുതലും ഒന്ന് വേറെ തന്നെയായിരുന്നു. അവരുടെ ദൈവാശ്രയ ബോധവും ദൈവത്തോടുള്ള ബന്ധവും വളരെ ആഴമുള്ളതാണ് എന്ന് മനസ്സിലാക്കി. വിവാഹദിനത്തിൽ എടുത്ത വചനം തന്നെയാണ് ശരി, മുന്നോട്ടുപോകാൻ തന്നെ തീരുമാനിച്ചു. ലോഫ് കൂട്ടായ്മ ഞങ്ങളെ സംബന്ധിച്ച് സാക്ഷികളുടെ ഒരു സമൂഹം ആയിരുന്നു. വചനം നമ്മെ പഠിപ്പിക്കുന്നത് അത് തന്നെ ആണല്ലോ! "നമുക്ക് ചുറ്റും സാക്ഷികളുടെ വലിയ സമൂഹം ഉള്ളതിനാൽ നമ്മെ വിഷമിപ്പിക്കുന്ന ഭാരവും പാപവും നമുക്ക് നീക്കി കളയാം." (ഹെബ്രായർ 12 :1)

 സിത്താർ പനംകുളം & റെൻസി സിത്താർ

ലോഫ് സെക്രട്ടറി ദമ്പതികൾ

മനോഹരമായ തലക്കെട്ടാണ് ഇപ്രാവശ്യത്തെ ലോഫ് ടൈഡിങ്സിൽ പങ്കുവയ്ക്കാനായി നൽകിയിരിക്കുന്നത്. LOAF എന്ന ലോകത്തിലെ ഏക സമർപ്പിത കുടുംബ കൂട്ടായ്മയെ ഇത്രയും ഉതകുന്ന രീതിയിൽ കാച്ചിക്കുറുക്കി ലോകത്തിലവതരിപ്പിക്കാൻ ഈ തലക്കെട്ട് തന്നെ ധാരാളം മതി. സമർപ്പിത കൂടുംബങ്ങൾ സഭയ്ക്ക് നന്മയാകുന്നത് ആ കുടുംബാംഗങ്ങൾ മുഴുവനായി ഈശോ മിശിഹായെ കണ്ടുമുട്ടി തങ്ങളെത്തന്നെ സമർപ്പിക്കുമ്പോഴും അതുവഴി സഭയിലൂടെ ഈശോ മിശിഹാ ലോകമെമ്പാടും പ്രഘോഷിക്കപ്പെടുമ്പോഴുമാണ്.

ഇത്തരത്തിൽ സമർപ്പിക്കപ്പെടാൻ കൂടുംബങ്ങളെ പ്രാപ്തമാക്കാൻ ലോഫ് വഹിക്കുന്ന പങ്ക് അഭിനന്ദനാർഹമാണ്. ചിട്ടയായ ക്രൈസ്തവ ജീവിത രീതി കുടുംബ ജീവിതത്തിൽ വളർത്തിയെടുക്കുവാൻ ലോഫിന് സാധിക്കുന്നു. കുടുംബപ്രാർത്ഥന, ദിവ്യബലി, മതബോധന പഠനം, സഹായ സഹകരണങ്ങൾ etc. എന്നിവയിലെല്ലാം ക്രിസ്തുവിനെ പ്രഘോഷിച്ച് കൊണ്ട് കുടുംബങ്ങളെ ഈശോയ്ക്ക് സമർപ്പിച്ചു ജീവിതം നയിക്കാൻ ഉതകുന്ന എല്ലാ ചേരുവകളും അടങ്ങിയ തരത്തിൽ ലോഫ് പ്രവർത്തിക്കുമ്പോൾ സഭ നന്മയാൽ പൂരിതമാക്കപ്പെട്ട് വ്യാപിക്കുന്നതായി കാണപ്പെടുന്നു. യേശുവിനെ അറിയുന്നതിലുമുപരി യേശുവിനെ കണ്ടുമുട്ടുവാൻ ഈ കുടുംബങ്ങൾ വഴി ലോകത്തിന് സാധ്യമാകുന്നു.

ദൈവം സൃഷ്ടിച്ച ആദ്യ കൂട്ടായ്മ കൂടുംബമാണെന്ന പ്രസ്താവം തികച്ചും അന്വർത്ഥമാക്കാൻ ലോഫിനാകുന്നു എന്നതിലൂടെ ദൈവകൃപ വിളഞ്ഞു നിൽക്കുന്ന വിളനിലമാകാൻ ഈ കുടുംബങ്ങൾക്ക് സാധിക്കുന്നത് അവരുടെ സമർപ്പണത്തിലൂടെയാണ്. അതുവഴി ആത്മീയവും മാനനസികവും ശാരീരികവുമായി ഒന്നു ചേർന്ന് നീങ്ങുന്ന ഈ ലോകയാത്രയ്ക്ക് അതിന്റെ ലക്ഷ്യസ്ഥാനമായ ദൈവരാജ്യം കൈവരിക്കാനാകുന്നു.

ആ ലക്ഷ്യം തെറ്റാതെ മുന്നേറാൻ ഈ കാലഘട്ടത്തിൽ സമൂഹത്തിൽ നിന്നു കൊണ്ട് മറ്റ് കൂടുംബങ്ങളിൽ വെളിച്ചം തെളിച്ച് ക്രിസ്തു കാണിച്ചു തന്ന വഴി തുറന്ന് കൊടുക്കാൻ അക്ഷരാർത്ഥത്തിൽ ലോഫിന് സാധിക്കുന്നു. ഇതാണ് സമർപ്പിത കുടുംബങ്ങൾ സഭക്ക് നൽകുന്ന യഥാർത്ഥ നന്മ.

 ഡാർവിൻ & ലിസ്മോൾ